Valijon Maxmudov

👤 Men haqimda

Kompyuter bilan 2015-yilda o'qishga kirganimdan boshlab tanishib boshlaganman. Litsey paytlari rus tilini yaxshi o'rganganim sababli kompyuterni o'rganish qiyin bo'lmagandi. O'qish paytlari oddiy amaliyotlar (antivirus bazasini yangilash, windows o'rnatish, printerlarni ulash) tanish va domlalarim uchun qayta qayta qilardim va nimadir yechim topishim kerak deb yurardim.

2017-yil Yoshlar Ittifoqi ko'magida 1-2 oy kompyuter savodxonligi bo'yicha bepul, oflayn dars o'tib ham yurgandim (o'sha paytlari yuritgan kanalim @kompyuter_savodxonligi), lekin bu yechim emasdi. Oddiy amaliyotlar uchun vaqtimni olishlarini yoki Malikaga borib qanchadir sarflab kompyuterlarini to'g'irlatishlari noto'g'ri deb o'ylab yurardim.

2020-yil karantin sababli hamma uyda o'tirishga majbur bo'lishdi va shunda videodarslar yozib institutdagi ustoz va kursdoshlarga tashlab qo'yaman deb kanal ochdim (Kompyuter Akademiyasini). Allohni marhamati bilan mehnatimiz ko'pchilikka yoqib, loyihalarimiz ommalashib ketdi.

IT sohasida onlayn ta'lim beruvchi kanal, botlar qilish bo'yicha ancha tajribam ortganidan so'ng moliyaviy loyihalar (ya'ni loyihadan maqsad pul topish bo'lganlari) qilishga harakat qildim, lekin ichki qadriyatlarim sababli oxirigacha olib bormadim. Va oxir oqibat bor e'tiborimni ta'lim bo'yicha loyihalarni yuritishga qaratdim.